အရွယ်တိုင်း အတွက် နောက်မကျတဲ့ Skin care

ကိုယ့်ကိုယ်ကိုယ် ယုံကြည်မှုရှိ နေစေဖို့ အများတကာနဲ့ ရင်ဘောင်တန်းပြီး လုပ်ငန်းခွင်မှာ တက်ကြွစွာ လှုပ်ရှား ဆောင်ရွက် နိုင်ဖို့ အများ အလယ် ပွဲလယ်တင့် စေဖို့ အတွက် အသားအရေ တင့်တယ် လှပမှုက ရာခိုင်နှုန်း အများကြီး မဟုတ်သော်ငြား အထိုက် အလျောက် အထောက် အကူ ပေးနိုင်ပါတယ်။ ဒါကြောင့်လည်း အသားအရေ ထိန်းသိန်းမှု၊ တစ်ကိုယ်ရေ သန့်ရှင်း စင်ကြယ်မှု နည်းနာနိဿယ တွေကို အတွေ့အကြုံရှိတဲ့ သူတွေက တစ်ဆင့် စိတ်ဝင်စားသူတွေ အတွက် ပြန်လည် ဖောက်သည်ချ ပေးနေမိတာပါ။

တကယ်တော့ ဒီခေါင်းစဉ်က ယနေ့ခေတ် ရှင်သန်လှုပ်ရှားနေကြတဲ့ သူတွေအတွက် စိမ်းနေတဲ့ အကြောင်းအရာ မဟုတ်တော့ပါဘူး။ အာရှ အသားအရေအတွက်လည်း အထူးစီမံပြီး သီးသန့် ဖော်စပ်ထားတဲ့ Skin Care Product တွေ အများကြီး ရှိလာနေပြီ ဆိုတော့ အသွင်မတူ မူကွဲပြားတဲ့ ပစ္စည်းတွေနဲ့ တိုက်ရိုက် ထိတွေ့နေသူတွေထံမှ စနစ်တကျ ထိန်းသိမ်း သုံးစွဲပုံတွေကို ဖော်ထုတ်ခဲ့တယ်။ ဒီတစ်ပတ်မှာ Skin Care အတွက် စကားပြောဖြစ်ခဲ့သူက မြန်မာပြည်သူတွေရဲ့ အသားအရေ အတွက် ထုတ်လုပ်ထားတဲ့ Garnier Skin Care မှ Marketing Manager မအက်စ်သာပါ။

ကျွမ်းကျင်သူ အဆင့်တော့ မဟုတ်ပါဘူး။ လေ့လာ ထားသလောက်၊ ကိုယ်ကိုယ်တိုင် အတွေ့အကြုံတွေက သိသလောက်ပါ။ Skin Care ဟာ အမျိုးသမီးဖြစ်စေ၊ အမျိုးသားဖြစ်စေ။ အရေးပါလိုအပ်တယ်လို့ ထင်တယ်။ ထိန်းသိမ်းမှုကျတော့လည်း အသက်အရွယ်လိုက်၊ အဆင့် လိုက်ရှိပေမယ့် ငယ်စဉ်က မသိခဲ့လို့ မလုပ်ဖြစ်ခဲ့သူတွေလည်း ရှိပါတယ်။ အခုအချိန်မှ စလုပ်လည်း မရဘူးလား ဆိုတော့ ရတာပါပဲ။ ကိုယ်တိုင်ရသင့်သလောက် ရခဲ့လို့ လည်း ယုံကြည်မှုရှိတယ်။ လေ့လာသင်ကြားရတဲ့အထဲ မှာလည်း အသားအရေဟာ အသက်အရွယ် အလိုက် ရှင်သန်နေတဲ့ အပိုင်းမှာ ပါတယ်။

အသက်အရွယ် ကြီး လာရင် အသားအရေကလည်း လိုက်ပြီး ရင့်ကျက်လာတယ်။ အားနည်းလာတယ်။ သူ့ကိုလည်း ထိန်းသိမ်းပြီး အားဖြည့်တာ လုပ်ပေးရတယ်။ မွေးကင်းစအရွယ်က စပြီး Skin Care ကို ဂရုတစိုက် ပုလုပ်ပေးခံရသူ၊ ကိုယ်တိုင်လည်း ဆက်လက်ပြီး ထိန်းသိမ်းသူ အနေနဲ့တော့ အကောင်းဆုံး အသားအရေကို ရရှိနိုင်ပါတယ်။ သို့ပေမယ့် အသားအရေနဲ့ ပတ်သက်ပြီး အမှန်တကယ် ပြောင်းလဲမှု တွေ့ရတဲ့ အရွယ်ကတော့ ဟိုမုန်းဓာတ် အများဆုံး ပြောင်းလဲချိန် ဆယ်ကျော်သက် အရွယ်ပါ။ အဲဒီ အပြောင်းအလဲ ကာလကနေစပြီး အသားအရေ ထိန်းသိမ်းဖို့ အသင့်တော်ဆုံးပါလို့ မအက်စ်သာက ဆိုတယ်။ ခန္ဓာကိုယ်ရဲ့အတွင်းပိုင်း ဇီဝကမ္မ ပြောင်းလဲမှုက နေပြီး ပြင်ပအရေပြား အပေါ်ယံ လွှာအထိ လိုက်လံ ပြောင်းလဲနေချိန်မှာ ကိုယ့်ရဲ့ပြောင်းလဲမှုတွေနဲ့ ကိုက်ညီတဲ့ ပုံစံအတိုင်း ထိန်းသိမ်း ပုပြင်ခြင်းဟာ အကောင်းဆုံး နည်းလမ်းတစ်ခုပါပဲ။

ကိုယ့်ရဲ့ ရောက်ရှိနေတဲ့ အသက်အရွယ်အရSkincare ပြုလုပ်ဖို့ အချိန်မီသေးရဲ့လားလို့ မေးခဲ့ရင် အရွယ်တိုင်းက မီပါတယ်လို့ မအက်စ်သာက ဆိုပါတယ်။ သူမအနေနဲ့လည်း နယ်မြို့မှာ ကြီးပြင်းခဲ့ သူဖြစ်တာကြောင့် ငယ်စဉ်က အသားအရေ ထိန်းသိမ်းမှုဆိုတာကို မယဉ်ပါးခဲ့သူပါ။ တခြားသူတွေရဲ့ ကောင်းမွန်တဲ့ အသားအရေနဲ့ ယုံကြည်မှုကို ကြည့်ပြီး ကိုယ်တိုင် စိတ်ပါဝင်စားစွာနဲ့ ပြုလုပ်ခဲ့တဲ့ ရလဒ်ကိုလည်း အပြည့်အ၀ မဟုတ်သည့် တိုင်အောင် ရသင့် သလောက် ရရှိထားပါတယ်။

မြန်မာပြည်ဖွား ပျိုမေတို့လို့ ဆိုလိုက်ပေမယ့် နေရာ ဒေသရော၊ ရာသီဥတု ပုံစံအရ အသားအရေ အမျိုးအစားလည်း ကွာခြားသွားတာ တွေ့ရပါတယ်။ ချင်းပြည်နယ်၊ ရှမ်းပြည်နယ် စတဲ့ တောင်ပေါ် အအေးပိုင်း ဒေသက ပျိုမေတွေဟာ အအေးပိုင်း ရာသီဥတုမှာ ဖြစ်တဲ့ အတွက် ခြောက်သွေ့တဲ့အသားအရေကို ပိုင်ဆိုင်ရတတ်ပါတယ်။ ဒါ့အပြင် နေလောင်ကွက်၊ တင်းတိပ်၊ မှဲ့ခြောက်တွေလည်း ရှိတတ်ပါတယ်။ အဲဒီဘက်မှာ အသုံးများတဲ့ အမျိုးအစားကတော့ Whitening Product တွေပါ။ မြန်မာပြည်ရဲ့ အလယ်ပိုင်းဇုံ (မန္တလေး၊ ပခုက္ကူ၊ အထက်အညာ)ဒေသတွေမှာတော့ ပူပြင်းတဲ့ ရာသီဥတုကြောင့် ခြောက်သွေ့ကြမ်းတမ်းမှုအပြင်၊ အဆီပြန်တတ်တဲ့ အသားအရေကိုပါ လက်ခံကြရပါတယ်။ အမည်းစက်၊ နေလောင်ကွက်ဆိုတာကလည်း နေရောင်ခြည်နဲ့ ထိတွေ့မှုရှိတဲ့ နေရာတိုင်းမှာ ဖြစ်တတ်ပါတယ်။

အဲဒီလို အလယ်ပိုင်းဇုံ ဒေသတွေမှာတော့ Moisturizer အဓိက လိုအပ်ပါတယ်။ Whitening Product တွေလည်း အသုံးများကြပါတယ်။
ရန်ကုန်မြို့မှာတော့ ပင်ကို အသားအရေအပေါ်ပဲ မူတည်ပြီး ရာသီ ဥတုကလည်း သင့်တင့်မျှတတဲ့ ရာသီဥတုလို့ ဆိုနိုင်ပါတယ်။ Skin Care အပေါ် နားလည် လက်ခံတဲ့သူများပြီး ခေတ်မီ Product တွေနဲ့ လည်း ရင်းနှီးကျွမ်းဝင်ပြီးသားသူတွေပါ။ ကိုယ်တိုင်အသားအရေ ကျွမ်းကျင်သူ ပညာရှင်များနဲ့ စမ်းသပ်စစ်ဆေးပြီး လိုက်ဖက် သင့်တော်တဲ့ Whitening Product ပစ္စည်းများကိုသုံးကာ ရလဒ်ကောင်းများကို ခံစားကြရပါတယ်။

ရန်ကုန်မြို့မှာလည်း အသုံးများတာကWhitening Product တွေပါပဲ။ တခြားအနေနဲ့ အသက်အရွယ်၊ အသားအရေအရ လိုက်ဖက်တဲ့ Product တွေ အသုံးပြုကြပေမယ့် Whitening Product တွေကတော့ လူကြိုက် များလှတဲ့ ပင်တိုင်စံ တွဲဖက် ပစ္စည်းတွေပါပဲ။ ဒီတော့ အာရှတစ်ခွင်မှာ Whiteninက အားအသာဆုံး Product ဖြစ်လို့နေပါတယ်။ Asia Skin ဟာ နူးညံ့ပြီး လှပတဲ့ အသားအရေပါ။ အာရှသားတွေ အတွက် အထူးစီမံပြီး ဖော်စပ်မှုတွေကို ဂျပန်ပြည်မှာ ဓာတ်ခွဲ စမ်းသပ်ပြီး ထုတ်လုပ်တယ်လို့Garniner မှ မအက်စ်သာက ဆိုပါတယ်။


နေ့အခါ Skin Care

ပုံမှန် မနက် အိပ်ရာ ထချိန်မှာ မျက်နှာ သန့်စင်မှုကတော့ လူတိုင်း လုပ်ဖြစ်တဲ့ အရာပါ။ မျက်နှာသစ် ဆပ်ပြာနဲ့ သေချာသန့်စင်အောင် ဆေးကြော ရပါမယ်။ ပြီးရင်Toner ကို အသုံးပြုခြင်းဖြင့် အသားအရေကို ညှိပေးပါတယ်။ အသက်အရွယ် အရ အသားအရေ တွန့်နေမှုများကိုတော့ ဒီအဆင့်မှာ Treatment ပါတဲ့ Product ကို အသုံးပြုရပါတယ်။ အသားအရေ တွန့်မှု တစ်ခုတည်း သာမကဘဲ တခြား အရေပြားဆိုင်ရာ ပြဿနာကိုလည်း သူ့ Treatmentနဲ့ သူ အသုံးပြုပေးရပါတယ်။ အဲဒီ နောက်မှာတော့ Day Cream (moisturizer ပါဝင်သော)ကို ထပ်ဖြည့်ရပါမယ်။ အခုလို အခြေခံ Skin Care တွေ ပုံမှန် ပြုလုပ် အပြီးမှာ အပြင် ထွက်မယ်ဆိုရင် နေရောင်ခြည်ဒဏ် ကာကွယ်တဲ့ အနည်းဆုံး SPF 15 ပါဝင်တဲ့ Cream တစ်မျိုးကို လိမ်းပေးခြင်းက အသင့်တော်ဆုံးပါပဲ။

ညအခါ သတိပြုစရာ

ညအိပ်ရာ ၀င်ခါနီးမှာလည်း ပထမအဆင့် မျက်နှာသစ် ဆပ်ပြာနဲ့ ဆေးကြော၊Toner နဲ့ အသားအရေ ညှိတာတွေကို ပုံမှန် ပြုလုပ်ပေးသင့်ပါတယ်။ ညဘက် အတွက် အထူး ဖော်စပ်ထားတဲ့ Night Cream ကို သုံးဖြစ်အောင် သုံးပေးခြင်းဖြင့် အသားအရေကို ပိုမို နူးညံ့ဝင်းမွတ် လာစေပါတယ်။ Night Cream တွေမှာ အများ အားဖြင့် Special Skin Care နဲ့ Treatmentတွေ ပါဝင်တဲ့ အတွက် အသားအရေကို ပိုပြီး ထိရောက်စွာ အကျိုးပြုပါတယ်။

လူတွေရဲ့ ခန္ဓာကိုယ်ထဲမှာ ရှိတဲ့ ဆဲလ်တွေနဲ့ ကိုလိုဂျင်တွေဟာ မက်မက် စက်စက် အိပ်ပျော် သွားတဲ့ အချိန်၊ နှစ်နှစ်ခြိုက်ခြိုက် အိပ်မော ကျနေတဲ့အချိန်မှာမှ Stimulate လုပ်တယ်လို့ လေ့လာမှု တချို့က ပြပါတယ်။ ဒီတော့ Night Cream သာ လိမ်းထားခဲ့မယ်ဆို အရေပြား အောက်မှာ ကိုလိုဂျင်များဟာ Night Cream မှာ ပါတဲ့ ကောင်းမွန်တဲ့ ဓာတ်တွေကို စုပ်ယူပြီး အသားအရေ အတွင်း ဖြန့်ဝေပေးခြင်းဖြင့် အသားအရေကို ပိုပြီးကောင်းမွန်စေပါတယ်။

မဖြစ်မနေ ပြုလုပ်သင့်တဲ့ Skin Care တစ်ခုကို ပြောပါဆိုရင်တော့ Cleaning ပါပဲ။ နေ့စဉ် မျက်နှာသစ် ဆပ်ပြာနဲ့ သေချာ ဆေးကြောသန့်စင် မှုသာမရှိခဲ့ရင် ချွေးပေါက်တွေကို ပိတ်သွားစေပြီး အရေပြားမှာ အရိပ်ထင်ကာ ၀က်ခြံ၊ တင်းတိပ်၊ မှဲ့ခြောက်များ ဖြစ်ပေါ်စေ ပါတယ်။ ဒါကြောင့် Skin Care ပစ္စည်းတွေကို အကြောင်း အမျိုးမျိုးကြောင့် မသုံးဖြစ်ဘူး ဆိုရင်တောင်မှ နေ့စဉ် ကိုယ့်ရဲ့ အသားအရေနဲ့ ကိုက်ညီတဲ့ မျက်နှာသစ် ဆပ်ပြာနဲ့ ပုံမှန် သန့်စင်သင့်တယ်လို့ မအက်စ်သာက ဆိုပါတယ်။ သို့ပေမယ့် ဘယ်အရာ မဆို အစွန်းရောက်ရင် မကောင်းကျိုးကိုပဲ ခံစားရတဲ့ အတွက် Skin Care ကို စနစ်တကျ ထိန်းသိမ်းသင့်တယ်လို့ အကြံပြုပါတယ်။

အရေပြား အပေါ်ယံလွှာကို အလှပြင် ပစ္စည်းတွေနဲ့ ပြုပြင်နေရုံ သာမက ကိုယ်တွင်း စင်ကြယ် သန့်ရှင်းမှု၊ ကျန်းမာမှုကိုလည်း အရေးပေး ဂရုစိုက် သင့်ပါတယ်။ အသားအရေ တွက် အရေးကြီးဆုံး၊ အကောင်းဆုံး တစ်ပါးကတော့ သန့်ရှင်း စင်ကြယ်တဲ့ ရေပါပဲ။ ခန္ဓာကိုယ် အတွက် လိုအပ်တဲ့ ပမာဏအတိုင်း ရေဓာတ်ပြည့်အောင် ဖြည့်စွမ်း ပေးနေဖို့ လိုပါတယ်။ နေ့စဉ်ရေများများ သောက်ပါ။ အရည်ရွှမ်းတဲ့ သစ်သီးများ စားပေးပါ။ ဗီတာမင်စီ ပါဝင်တဲ့ အသီးအနှံများများ စားပါ။ လတ်ဆတ်တဲ့ သခွားသီး၊ အာလူး၊ မုန်လာဥနီ အရည်များနဲ့ အသားအရေကို ညင်သာစွာ လိမ်းပြီး နှိပ်နယ်ပေးပါ။ ဒီနည်းလမ်း တွေက ဘေးထွက် ဆိုးကျိုးမရှိတဲ့ အသားအရေ ထိန်းသိမ်းမှုအတွက် အကောင်းဆုံး နည်းလမ်းတွေပါပဲ။ Garnier မှ မအက်စ်သာကတော့ သူမတို့ အနေနဲ့ ကြော်ငြာရုံ သက်သက် မဟုတ်ဘဲ တကယ့် စေတနာနဲ့ စနစ်တကျ သုံးစွဲတတ်ဖို့ အတွက် နယ်မြို့များအထိ ပညာပေး သရုပ်ပြ အစီအစဉ်တွေ ပြုလုပ်နေပြီလို့ ဆိုတယ်။ ပျိုပျို၊ အိုအို၊ အရွယ်စုံ ပြုလုပ်သင့်ပြီး မည်သည့် Product ကို မဆို ကိုယ်တိုင် စမ်းသပ်ပါ။ လေ့လာပါ။ သုံးကြည့်ပါ။ ပြီးမှ ယုံပါတဲ့။

Garnier Skin Care က အာရှသူတွေ အတွက် အထူးစီမံ ဖော်စပ် ထုတ်လုပ်ထားတဲ့ အပြင် အသက်အရွယ်လိုက်၊ Skin Type အလိုက် အမျိုးအစား သတ်မှတ်ထားပါတယ်။ Garnier ကောင်တာတိုင်း မှာလည်း နားလည် တတ်ကျွမ်းတဲ့ သူများက Product အသုံးပြုပုံနည်း စနစ်များကို ရှင်းလင်း ပြောပြနေပါတယ်လို့ ဆိုပါတယ်။ ဒီတော့ Skin Care ကို စိတ်ပါဝင်စားတဲ့ teen ပရိသတ် ကြီးလည်း မည်သည့် Skin Care Product ကိုမဆို ကိုယ်တိုင် လေ့လာ၊ စမ်းသပ်၊ သုံးကြည့်ပါ။ ပြီးမှယုံပါလို့ ဆိုပါရစေ။
သင်းပပ